సిటీ పోలీసు బదిలీలు 610కి విరుద్ధం: దారా eenadiuu

ఒంగోలు, న్యూస్‌టుడే:

హైదరాబాద్‌ సిటీ పోలీసులుగా పని చేస్తోన్న 1428 మంది కానిస్టేబుళ్లను స్థానికేతరులుగా పేర్కొంటూ బదిలీ చేయటం 610 జి.ఒ.కి విరుద్ధమని ప్రకాశం జిల్లా, సంతనూతలపాడు నియోజకవర్గ ఎమ్మెల్యే, 610 జి.ఒ. సభా సంఘం సభ్యుడు దారా సాంబయ్య పేర్కొన్నారు. మంగళవారం సాయంత్రం ఆయన 'న్యూస్‌టుడే'తో మాట్లాడారు. 610 జి.ఒ. పేరిట హైదరాబాద్‌ సిటీ పోలీసులను బదిలీ చేయటం రాజ్యాంగ విరుద్ధమని వ్యాఖ్యానించారు. వీరిని బదిలీ చేయాలంటే రాష్ట్రపతి ఉత్తర్వులను సవరించాల్సి ఉంటుందన్నారు. హైదరాబాద్‌ సిటీ పోలీసులు స్పెషల్‌ జోన్‌ పరిధిలో ఉంటారని చెప్పారు. ఈ అంశాలన్నీ తెలిసినప్పటికీ కొందరు ఉన్నతాధికారులు ప్రభుత్వాధినేతలను తప్పుదోవ పట్టిస్తున్నారని ఆరోపించారు. ప్రస్తుతం బదిలీ అయిన కానిస్టేబుళ్లలో ఎవరైనా కోర్టును ఆశ్రయిస్తే బదిలీలు నిలిచిపోతాయన్నారు. అప్పుడు ప్రభుత్వం అప్రదిష్ట పాలవుతుందన్నారు. తెలంగాణా నేతలు 610పై అనవసర రాద్ధాంతం చేస్తున్నారని విమర్శించారు.