610పై రేపు కలెక్టర్లతో సీఎస్‌ వీడియో కాన్ఫరెన్స్‌ eenadu

మరో 17 మందికి బదిలీ ఉత్తర్వులు
610 జీవో అమలును వేగవంతం చేసేలా గురువారం జిల్లా కలెక్టర్లతో రాష్ట్ర ప్రభుత్వ ప్రధాన కార్యదర్శి(సీఎస్‌) హరినారాయణ వీడియో కాన్ఫరెన్స్‌ నిర్వహించనున్నారు. మరోవైపు స్వచ్ఛంద బదిలీల కోసం దరఖాస్తు చేసుకున్న 17 మంది స్థానికేతరులను బదిలీ చేస్తూ ఉత్తర్వులు జారీ అయ్యాయి. దీంతో మంగళవారం వరకు మొత్తం బదిలీల సంఖ్య 20 శాఖల్లో 777కి చేరింది. స్వచ్ఛంద బదిలీల కొనసాగింపు, 1975 నుంచి స్థానికేతరుల గుర్తింపు, డిప్యుటేషన్ల రద్దుకు సోమవారం హరినారాయణ ఉత్తర్వులు జారీ చేసిన విషయం తెలిసిందే. వీటిపై చాలా శాఖల నుంచి సందేహాలు వ్యక్తమయ్యాయి. సాధారణ పరిపాలన శాఖాధికారులు వీటన్నింటిని ఆయన దృష్టికి తీసుకెళ్లారు. దీంతో కలెక్టర్లతో, అన్ని శాఖల అధిపతులతో వీడియో కాన్ఫరెన్స్‌ నిర్వహించి, ఈ సందేహాలను నివృత్తి చేయాలని సీఎస్‌ నిర్ణయించారు.